საქართველოს მოქმედმა ჩემპიონმა “ოლიმპმა” რუსთავში მიიღო “ზესტაფონი” და მარცხი განიცადა - 0:1. ამ შეხვედრაში გოცირიძემ გამარჯვების გოლი მატჩის დასრულებამდე სამი წუთით ადრე გაიტანა.

გორის “დილამ” საკუთარ მოედანზე “ბორჯომს” უმასპინძლა და 3:2 სძლია. მასპინძელთაგან გოლები გაიტანეს წინამძღვრიშვილმა (21-ე წუთზე), ბალიაშვილმა (36) და შატაკიშვილმა (83), ხოლო სტუმართაგან მატჩის მიწურულს ორი საპასუხო ბურთი თედიაშვილმა (82) და ჩილიკაშვილმა (92) ჩაიწერეს თავის ანგარიშზე.

თასის პირველი მეოთხედფინალური მატჩების დარჩენილ ორ შეხვედრას გორი უმასპინძლებს: დღეს, 18 თებერვალს ცხინვალის “სპარტაკი” “ქართლის” სტადიონზე თბილისის “დინამოს” მიიღებს, ხოლო 19 თებერვალს, ჭიათურის “მაღაროელი” თბილისის “ამერს”დაუპირისპირდება. “მაღაროელსა” და “ამერს” შორის მატჩი თავდაპირველად ქუთაისში უნდა ჩატარებულიყო, მაგრამ დიდთოვლობის გამო შეხვედრა ქართლის უპირველეს ქალაქში გაიმართება.

“ინტერპრესნიუსი”