ს.ფ.ფ. - ს პრეზიდენტ ნოდარ ახალკაცთან ინტერვიუ ჩაწერა გაზეთმა ლელომ მანამდე სანამ პრეზიდენტი საქმეებზე წავა. ის ჯერ სანკტ-პეტერბურგში მერე ზაგრებში და ბოლოს შვეიცარიაში უნდა წავიდეს ასე რომ ლელომ სანამ დრო იყო ინტერვიუ ჩამოართვა.

როგორც გაცხადდა, კლაუს ტოპმიოლერი რამდენიმე დღეში გააფორმებს ახალ კონტრაქტს. ამბობენ, რომ ამ ხელშეკრულებაში მისი ხელფასი უფრო ნაკლებია. ასეა?

კონტრაქტის გახანგრძლივებასთან დაკავშირებით კლაუს ტოპმიოლერთან რამდენიმე თვის წინ შევთანხმდით. კონტრაქტს ხელი მალე მოეწერება. ბუნებრივია, პრესკონფერენციასაც მოვიწვევთ და მედიის წარმომადგენლებთან დეტალებზეც გვექნება საუბარი. რაც შეეხება კლაუსის ხელფასს, მისი ანაზღაურება კიდევ უფრო მეტად იქნება ორიენტირებული ნაკრების მიერ ნაჩვენებ შედეგზე.

 ნაკრების მიზანი 2010 წლის მსოფლიო ჩემპიონატზე მოხვედრაა. ჩადებულია თუ არა კლაუს ტოპმიოლერთან გასაფორმებელ კონტრაქტში მისი შესაძლო გაგრძელების პუნქტი?

ბუნებრივია. მსოფლიო ჩემპიონატის ფინალურ ეტაპზე გასვლის შემთხვევაში მწვრთნელთან კონტრაქტი გაგრძელდება.

ჰაინც ტოპმიოლერი და ჰერბერტ ცანკერი საქართველოში აღარ იმუშავებენ?

ამ საკითხზე საბოლოო გადაწყვეტილება ჯერ არ მიგვიღია, თორემ ამას არც დავმალავდით. გერმანელი მწვრთნელების საქართველოში ჩამოყვანის პირველივე დღიდანვე ვამბობდით, რომ ნაკრებ გუნდებში საჭიროა ქართველი მწვრთნელების ინტეგრაცია და ეს განვახორციელეთ კიდეც. ჩვენ გვინდა, პრესკონფერენციაზე სრული კონცეფციით წარვდგეთ მედიის წინაშე. ამ კონცეფციის კომპონენტებია ტალანტების აღმოჩენა, ბავშვთა, ჭაბუკთა და მოზარდთა ფეხბურთის განვითარების პროგრამა, ახალგაზრდული ნაკრები გუნდები და ასე შემდეგ.

ჩვენი ინფორმაციით, 17-წლამდელთა ნაკრებს გელა შეყილაძე უთავკაცებს, 19-წლამდელებს კი ზაურ სვანაძე...

ეს ვერსია ჩვენი ერთ-ერთი ვარიანტია, მაგრამ ეს ზოგადი კონცეფციის ნაწილია და ჯერ დეტალებზე ვერ ვისაუბრებ. ზაურ სვანაძისა და გელა შეყილაძის კარიერა, როგორც ფეხბურთელებისა და როგორც მწვრთნელების, ყველამ კარგად იცის და მათზე კარგის მეტს ვერაფერს ვიტყვით. მათ ეს თავისი საქმიანობით, პროფესიონალიზმითა და ცხოვრების წესით დაამტკიცეს.

თუ მოვლენები ასე განვითარდა, ზაურ სვანაძეს შვედური GFFF-ის დატოვება მოუწევს...

ცხადია, ასე იქნება. 19-წლამდელთა ნაკრების მთავარი მწვრთნელობის შემთხვევაში, ზაურ სვანაძის შვედეთში მუშაობის ალბათობა ნულამდე იქნება დასული. 19-წლამდელთა ასაკში ფეხბურთელებზე ჩვენ დიდ ინფორმაციას ვფლობთ, მაგრამ ამ ასაკში ფიზიოლოგიურად ახალგაზრდა ფეხბურთელი მალე იცვლება და გარკვეული სასელექციო სამუშაოები კიდევ იქნება ჩასატარებელი. ასე რომ, კომპლექსური და შრომატევადი საკითხებია და ვერ წარმომიდგენია ამის გაკეთება შვედეთში პარალელურად მუშაობის რეჟიმში.

ამ ვარიანტის რეალობად ქცევის შემთხვევაში, ეროვნულსა და ახალგაზრდულს თითო მწვრთნელ-ასისტენტი მოაკლდება. მათ ადგილს სხვები ხომ არ დაიკავებენ და ვინ იქნებიან ისინი?

დამოუკიდებლად იმისა, თუ ვინ რომელ პოსტს დაიკავებს და რა გადანაცვლებები მოხდება, თუ თარიღებში თანხვედრა არ იქნება, ყველა ასაკის ნაკრებთა მწვრთნელებს ვთხოვთ, გარკვეული დრო გაატარონ ეროვნულ ნაკრებთან ერთად. კლაუს ტოპმიოლერის დონის სპეციალისტთან მუშაობა ყველასთვის სტაჟირების საუკეთესო საშუალებაა.

ციურიხში ”ინფრონტის” ხელმძღვანელობას შეხვდებით. ეს კომპანია ჩვენი ეროვნული ნაკრების სატელევიზიო ექსკლუზიურ უფლებას ფლობს და როგორც გავიგეთ, ”ინფრონტისგან” ფედერაცია 1,9 მილიონ ევროს მიიღებს. ასეა თუ შესაძლებელია, ეს თანხა კიდევ გაიზარდოს?

ესა თუ ის თანხა და ციფრი ხშირად გაჟღერებულა, მაგრამ ბოლოს რეალობისგან შორს ყოფილა. ”ინფრონტთან” გაფორმებულ კონტრაქტში არის პუნქტი, რომელიც თანხის კონფიდენციალობას ითვალისწინებს და ვალდებული ვართ, ეს პირობა დავიცვათ. ”ინფრონტთან” ჩვეულებრივი, რიგითი შეხვედრა გველის და არა გადამწყვეტი. დიდი ხანია, ორი მხრიდანაა აუდიენციის სურვილი. ამ პერიოდში ევროპაში ვიქნებით და ზაგრებში დანიშნულ უეფა-ს აღმასკომის სხდომას ”მივაბით” ეს შეხვედრა. ასე რომ, თბილისისკენ მომავალ გზაზე შვეიცარიაში ერთი დღით შევყოვნდებით.

”ინფრონტთან” კონტრაქტი ხომ არ გაგრძელებულა?

მოქმედი ხელშეკრულება 2006 წელს გავაგრძელეთ და 2013 წელს მთავრდება. მინდა ხაზგასმით აღვნიშნო, რომ ”ინფრონტთან” კონტრაქტი არ გაგრძელებულა.

რამდენიმე დღეში ეროვნული ნაკრები ლატვიასთან მატჩისთვის მზადებას დაიწყებს...

შეკრება 4 თებერვალს დაიწყება. შედარებაც კი არ შეიძლება იმ სიტუაციასთან, რაც ორი წლის წინ იყო. მაშინ ეროვნული ნაკრების წევრ-კანდიდატებზე მწვრთნელებს ინფორმაციაც კი არ ჰქონდათ. ახლა კი არა მარტო ინფორმაციას ფლობენ გაფართოებულ სიაში მყოფ წევრ-კანდიდატების შესახებ, არამედ მწვრთნელებს ისინი გამოცდილი ჰყავთ საერთაშორისო დონის ამხანაგურ და ოფიციალურ მატჩებში. უფრო მეტიც, უკვე არსებობს ნაკრების ბირთვი, რომელიც გამობრძმედილია და ჩამოყალიბებულია ევროპულ და არაევროპულ ნაკრებებთან პაექრობაში. არიან ახალი სახეები, ახალგაზრდა, მაგრამ დიდი ტალანტის მქონე მოთამაშეები... ახლა კი ამ ყველაფერს შეზავება ესაჭიროება. ეროვნული ნაკრების შტაბთან ერთად უკვე დავგეგმეთ 2008 წლის პროექტი და მას განვახორციელებთ კიდეც.

იქნებ უფრო კონკრეტულად გვითხრათ ამ პროექტის შესახებ...

თებერვლისა და მარტის ამხანაგური მატჩები საექსპერიმენტოდ უნდა გამოვიყენოთ. ამის შემდეგ ჩვენ მაისში, ევროპაში ერთკვირიანი მოსამზადებელი შეკრება გვაქვს დაგეგმილი ორი ამხანაგური მატჩით. მაისში ამ შეკრებაზე ის შემადგენლობა წავა, რომელიც მეტ-ნაკლებად მიახლოებული იქნება იმ კონტინგენტთან, რომელიც სექტემბერში შესარჩევ ციკლს დაიწყებს. 20 აგვისტოს უელსთან ამხანაგურ მატჩში კი ის შემადგენლობა იასპარეზებს, რომელიც საკვალიფიკაციო ეტაპს სექტემბერში დაიწყებს. თუმცა, ისიც გასათვალისწინებელია, რომ ნაკრებში ადგილი არავის აქვს დაჯავშნული, ვნახოთ, ვინ როგორ წარმოაჩენს თავს.

დავით ცაბაძე