მიმდინარე წლის ივლისში თბილისის "ამერი" შეკრებაზე ჩეხეთში იმყოფებოდა, სადაც ახალგაზრდა პერსპექტიულმა ფორვარდმა რატი წინამძღვრიშვილმა მუხლის მძიმე ტრავმა მიიღო და
საოპერაციო გახდა. რატის ჩეხმა პროფესორმა ვანეჩეკმა ორი ოპერაცია გაუკეთა და მას შემდეგ მინდორს არ გაჰკარებია...

- ჯერ ისევ ტრენაჟორებზე ვვარჯიშობ და აუზზე დავდივარ, რამდენიმე დღეში კი ნელ-ნელა ძუნძულსაც დავიწყებ, რაც ძალიან მახარებს.
- ცხადია, ისევ ექიმების მეთვალყურეობის ქვეშ იქნები...
- რა თქმა უნდა, კლუბის ექიმებთან მაქვს კავშირი და თბილისში პროფესორ პავლე კასრაძესთან დავდივარ კონსულტაციებზე. მის გარეშე ფეხს არ ვდგამ.
- თამაშის დაწყებას, სავარაუდოდ, როდის შეძლებ?
- როგორც ექიმები მეუბნებიან, აპრილში თამაშს შევძლებ და ერთი სული მაქვს, როდის მოვა ეს დღე.
- "ამერმა" ახლახან სუპერთასი მოუგო რუსთავის "ოლიმპს" (2:0). მატჩს, რა თქმა უნდა, ნახავდი...
- ტელევიზორში ვუყურე და ბიჭებმა ძალიან კარგად ითამაშეს. მთელი პირველი წრე ვერ აეწყვნენ, ეს შეხვედრა კი მაღალ დონეზე ჩაატარეს. სიმართლე გითხრათ, პირველ წრეში რამდენჯერმე ვნახე "ამერის" თამაში ტრიბუნიდან და ძალიან განვიცადე. როგორია, ზიხარ და ვერ ეხმარები... ამ სიტუაციას ჭკუიდან გადავყავარ.

რატის რომ დავემშვიდობეთ, მისი მუხლის ამჟამინდელი მდგომარეობის თაობაზე პროფესორ პავლე კასრაძესაც ვკითხეთ...
"სარეაბილიტაციო პროცესი ნორმალურად მიდის. მის კუნთებს ვამყარებთ და უახლოეს დღეებში ძუნძულსაც დაიწყებს" - გვითხრა კასრაძემ.

ნუკრი ლოლაძე   (საიტზე გამოაქვეყნა: გიორგი ყამბარაშვილმა)
სარბიელი
17.12.2007