დღეს საქართველოს ფეხბურთის ფედერაციის დაბადების დღეა - ქართული ფეხბურთის მმართველი ორგანიზაცია 18 წლის იუბილეს ზეიმობს!

საქართველოს ფეხბურთის ფედერაცია 1990 წლის 15 თებერვალს, დამფუძნებელი ყრილობის შედეგად დაარსდა. ამ სხდომის შემდეგ ქართულმა კლუბებმა უარი განაცხადეს ჯერ კიდევ ერთიანი საბჭოთა კავშირის ჩემპიონატის უმაღლეს და დაბალ ლიგებში თამაშზე, 30 მარტს კი, სფფ-ის დიდი ძალისხმევით, პირველი ეროვნული ჩემპიონატიც დაიწყო.

საქართველო იყო პირველი ყოფილ საბჭოთა კავშირის რესპუბლიკებს შორის, რომელმაც ოფიციალურად დატოვა სსრკ-ის საფეხბურთო კავშირი და დამოუკიდებელი გზა აირჩია!

საქართველოს ფეხბურთის ფედერაციის პირველ პრეზიდენტად XX საუკუნის საუკეთესო ქართველ მწვრთნელად აღიარებული ნოდარ ახალკაცი აირჩიეს. თასების მფლობელთა თასის 1980-81 წლების გათამაშებაში გამარჯვებული თბილისის ”დინამოს” თავკაცი ამ თანამდებობაზე გარდაცვალებამდე, 1998 წლის იანვრამდე მოღვაწეობდა.

1992 წლის 25 თებერვალს ფიფა-მ საქართველოს ფეხბურთის ფედერაცია დროებით წევრად მიიღო, ხოლო იმავე წლის 3 ივლისს, შვეიცარიის ქალაქ ციურიხში გამართულ მორიგ კონგრესზე, ფიფა-მ საქართველოს ფეხბურთის ფედერაცია სრულუფლებიან წევრად აღიარა!

1992 წლის მაისში ქართული ფეხბურთის მმართველი ორგანიზაცია უეფა-მ დროებით წევრად აღიარა, 1993 წლის 17 ივნისს კი მუდმივ წევრად.

საქართველოს ფეხბურთის ფედერაციის მეორე პრეზიდენტი გახლდათ მერაბ ჟორდანია, რომელიც ამ თანამდებობაზე 1998 წელს აირჩიეს.

ორგანიზაციის დღევანდელი თავკაცი ნოდარ ახალკაცი უმცროსი საქართველოს ფეხბურთის ფედერაციის რიგით მესამე პრეზიდენტია. ის ამ თანამდებობაზე 2005 წლიდან მოღვაწეობს.

1992 წლიდან საქართველოს ეროვნული და სხვადასხვა ასაკის ნაკრებები საერთაშორისო მატჩებს ატარებენ, ხოლო 1993-94 წლების სეზონიდან ქართული კლუბები უეფა-ს საკლუბო გათამაშებებში მონაწილეობენ.

სფფ-ის პრესცენტრი